O noso reto: inserción laboral de discapacitados intelectuais.

Fai xa algúns anos que no grupo de empresas Fomento de Iniciativas tomamos a decisión de asumir un novo reto: conscientes do noso compromiso social, decidimos abrir as nosas ofertas laborais a persoas con minusvalidez intelectual.

Pasado este tempo, coas persoas plenamente integradas e demostrando as súas aptitudes, compromiso e capacidades, estamos tan orgullosos da experiencia e da corresponsabilidade ética, social e empresarial que nos está a achegar, que queremos animar e apoiar a outras empresas ou organismos a que se involucren, coa seguridade de que os beneficios obtidos superarán amplamente o esforzo.

Un compromiso rendible.

Non tes unha ONG, tes unha empresa, buscas rendibilidade. Tes iniciativa e queres facer algo máis. Por iso imos darche varias razóns, coas que esperamos convencerte de que un proxecto deste tipo tamén pode ser bo para a túa empresa:

Orgullo e satisfacción polo compromiso.
Traballadores e traballadoras que se involucran, que se senten parte dunha empresa e un proxecto responsable. A homoxeneidade é aburrida, a diversidade é enriquecedora para todos.
Visibilidade social.
Presenza en medios de comunicación.
Bonificacións.

Emprego con apoio.

As persoas con discapacidade intelectual encontran moitas dificultades no mercado de traballo ordinario polo descoñecemento das súas capacidades por parte do empresariado e pola crenza nas dificultades de integración destas persoas.

A metodoloxía de emprego con apoio trata de axudar por medio dun conxunto de actividades de orientación e acompañamento individualizado que prestan, no propio posto de traballo, preparadores e preparadoras laborais. O proxecto conta cunha formación práctica na empresa, previa ao emprego.

O noso proxecto contou coa colaboración de FADEMGA, onde poden ofrecervos toda a información e axuda que necesitedes.